មូស្គូ៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានបញ្ជាឱ្យបញ្ជាការយោធារបស់លោក ឱ្យដាក់កងកម្លាំងត្រៀមរបស់រុស្ស៊ី ដែលសំដៅទៅលើអង្គភាពដែលរួមមានអាវុធនុយក្លេអ៊ែរផងដែរ ឱ្យមានការប្រុងប្រយ័ត្នខ្ពស់ ដោយលើកឡើងពីសេចក្តីថ្លែងការណ៍ដ៏គឃ្លើនរបស់មេដឹកនាំអង្គការសន្ធិសញ្ញាអាត្លង់ទិកខាងជើង (NATO) និងការដាក់ទណ្ឌកម្មសេដ្ឋកិច្ចប្រឆាំងនឹងទីក្រុងមូស្គូ។

លោកប្រធានាធិបតី ពូទីន បានថ្លែងក្នុងសេចក្ដីថ្លែងការណ៍លើកញ្ចក់ទូរទស្សន៍ជូនដល់ប្រជាជនថា៖ «ខ្ញុំបញ្ជាឱ្យរដ្ឋមន្ត្រីការពារជាតិ និងជាប្រធានអគ្គសេនាធិការនៃកងកម្លាំងប្រដាប់អាវុធរុស្ស៊ីដាក់កងកម្លាំងរារាំងរបស់កងទ័ពរុស្ស៊ីទៅជារបៀបពិសេសនៃការប្រយុទ្ធ»។

ទីក្រុងមូស្គូមានឃ្លាំងអាវុធនុយក្លេអ៊ែរធំជាងគេទីពីររបស់ពិភពលោក និងឃ្លាំងផ្ទុកមីស៊ីលផ្លោងដ៏ធំ ដែលបង្កើតបានជាឆ្អឹងខ្នងនៃកងកម្លាំងយោធារបស់ប្រទេស។ ប្រទេសរុស្ស៊ីត្រូវបានគេប៉ាន់ប្រមាណថាមានក្បាលគ្រាប់នុយក្លេអ៊ែរជាង ៦ពាន់ក្បាលគ្រាប់៕